Haqqında

 

Magistratura şöbəsi

  

Hal-hazırda  ADNSU-da 30 ixtisas və 51 ixtisaslaşmalar  üzrə magistr hazırlığı aparılır. I kursda təhsil alanların sayı 1030, II kursda – 819. Təhsilin növbəti ilinə qalanların sayı – 77 nəfərdir.

 

I kursda 73, II kursda isə 82 akademik qrup mövcuddur. 155 qrupda tədrisə 1926 nəfər cəlb olunmuşdur, onlardan 14 əcnəbi vətəndaşlardır. Azərbaycan bölməsində 1510 nəfər, rus bölməsində 200, ingilis bölməsində isə 139  magistrant təhsil alır. Dövlət sifarişilə oxuyan magistrların sayı 1121 nəfərdir, ödənişlilərin isə 805 nəfərdir. 1 tələbə qiyabi şöbədə təhsil alır.

 

Magistratura pilləsində tələbələrin oxuyaraq öz ixtisasları üzrə işləmələrinə şərait yaratmaq məqsədilə dərslər saat 18:30-də başlayır. 2021/2022-ci tədris ilində ADNSU-nun 1-ci kurs magistrantlarının 82%-i, 2-ci kurs magistrantlarının isə 93%-i təhsil almaqla bərabər işləyir.  

 

ADNSU-da magistr hazırlığı Nazirlər Kabinetinin 13.02.97 tarixli 15 saylı qərarına əsasən təsdiq edilmiş “Çoxpilləli ali təhsil sistemində magistratura haqqında”, Təhsil Nazirliyinin 22.04.97-ci il 235 saylı əmri ilə təsdiq olunmuş “Magistr hazırlığının minimum məzmununa və səviyyəsinə qoyulan tələblərin strukturu”na, Təhsil Nazirliyinin 18.06.2011-ci il 59 saylı “Magistratura səviyyəsində mövcud vəziyyət, problemlər və onların həlli yolları barədə” kollegiyasının qərarına, Azərbaycan Respublikası Təhsil Nazirliyinin 202 nömrəli 20.04.98-ci il tarixli əmri ilə təsdiq olunmuş “Magistrlik dissertasiyasının hazırlanması, təqdim olunması və müdafiəsi qaydaları”na, Azərbaycan Respublikası Təhsil Nazirliyinin 742 nömrəli 10.11.98-ci il tarixli əmri ilə təsdiq olunmuş “Magistrlik dissertasiyasının müdafiəsi üçün ixtisaslaşdırılmış Elmi Şuralar haqqında Əsasnaməsi”nə, Azərbaycan Respublikasının Nazirlər Kabinetinin “Ali təhsil müəssisələrinin bakalavr və magistratura səviyyələrində kredit sistemi ilə tədrisin təşkili qaydaları”nın təsdiq edilməsi haqqında 24 dekabr 2013-cü il tarixli 348 nömrəli qərarının tələblərinə və digər normativ sənədlərə uyğun təşkil edilib.

  

ADNSU-da magistr hazırlığı aşağıdakı istiqamətlərdə aparılır

  

 

Azərbaycan Dövlət Neft və Sənaye Universiteti (ADNSU) Amerika Birləşmiş Ştatlarının Corciya Dövlət Universiteti ilə birgə 1998-ci ildən ingilis dilində MBA (Master of Business Administration) Proqramı çərçivəsində “Biznesin təşkili və idarə edilməsi”, “İdarəetmədə informasiya sistemləri” və “Menecment” ixtisasları üzrə magistr hazırlığı aparır.

 

 “Ətraf mühit və neft sənayesi” ixtisası üzrə Fransanın Sofiya – Antipolis və İtaliyanın Genuya universitetləri tərəfindən hazırlanmış birgə magistr tədris planı əsasında Azərbaycan və rus dillərində mütəxəssis hazırlığı müvəffəqiyyətlə davam etdirilir.

 

Almaniyanın Köln Tətbiqi Elmlər Universiteti, Avstriyanın Graz Texniki Universiteti və Polşanın Varşava Texnologiya Universiteti ilə əməkdaşlığımız nəticəsində birgə tərtib olunmuş tədris planları əsasında “Proseslərin avtomatlaşdırılması mühəndisliyi” və “Elektroenergetika mühəndisliyi”, magistratura səviyyəsində isə “(Neft sənayesində) Enerji menecmenti” ixtisas şuraları üzrə mütəxəssislər hazırlanır. Bu üç ixtisas Almaniyanın ASIIN Consult Agentliyi tərəfindən akkreditasiya olunub.

 

 Magistratura bölməsi Universitetin Elmi Şurasının 14 dekabr 2002-ci il tarixli iclasında (protokol №10) qəbul olunmuş Əsasnaməyə əsasən öz işini təşkil edir. Bölmə ADNSU-da mütəxəssis hazırlığı aparılan bütün istiqamətlər və proqramlar (o cümlədən beynəlxalq) üzrə magistratura səviyyəsində tədris prosesinin planlaşdırılması, təşkili və idarə olunması ilə bağlı işlərə rəhbərlik edir.

 

Bölmə mövcud qaydada ADNSU-nun Nizamnaməsinə müvafiq olaraq Universitetin Elmi Şurasının qərarına əsasən rektorun əmri ilə yaradılır və ləğv edilir.

 

Magistratura bölməsinin “Elmi Şurası” Elmi işlər üzrə prorektorun başçılıq etdiyi və bölmənin fəaliyyətində kollegial qərarlar qəbul edən orqandır. Şuranın tərkibinə ADNSU-nun magistr hazırlığı aparılan fakültələrin dekanları və beynəlxalq proqramlar üzrə rəhbərlər koordinator kimi daxil edilirlər. Şura üzvlüyünə həmçinin müvafiq fakültə dekanlarının təqdimatına əsasən magistr hazırlığı aparılan ixtisas kafedra müdirləri də seçilir.