Fevralın 17-də Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı ABŞ səfirliyinin Mədəniyyət və Təhsil üzrə müşaviri Riçard Pinkham və nümayəndə heyəti ilə görüşüb.
Qonaqları salamladıqdan sonra rektor, professor M.Babanlı ADNSU-da tədris, beynəlxalq əlaqələr, akkreditasiya olunan və ingilis dilli ixtisaslar, yaşıl enerji layihələri və universitetdə görülən işlərlə bağlı qonaqlara məlumat verib. ABŞ universitetləri ilə əlaqələrin daha da genişləndirilməsinin, xüsusən də tədqiqat yönümlü əməkdaşlığın, birgə startap layihələrinin həyata keçirilməsinin, süni intellekt və İT sahəsində əməkdaşlığın universitet üçün vacib olduğunu deyən rektor M.Babanlı növbəti tədris ilindən süni intellekt sahəsində, həmçinin xarici professorların cəlb olunması istiqamətində bir sıra yeni layihələrin nəzərdə tutulduğunu qeyd edib.
ADNSU-da olmaqdan məmnunlğunu ifadə edən R.Pinkham səfirliyin hazırda mövcud olan təhsil proqramlarından danışıb. R.Pinkham tələbə və müəllim mübadiləsinə imkan yaradacaq layihələrin reallaşmasında, həmçinin startap və süni intellektlə bağlı layihələrdə, eləcə də əməkdaşlığın daha da inkişaf etdirilməsində maraqlı olduqlarını vurğulayıb.
Sonra təhsil sahəsində yeni layihələrin icrası və praktiki müstəvidə əməkdaşlığın inkişafı məsələləri müzakirə olunub.
Görüşün sonunda qonaqlara xatirə hədiyyələri təqdim edilib.