Xəbərlər

Martın 4-də Azərbaycan Dövlət Neft və Sənaye Universitetində (ADNSU) Layihələrin İdarə Edilməsi Azərbaycan Assosiasiyasının təşəbbüsü ilə icra olunan layihə çərçivəsində 8 universitetdən olan müəllim kollektivinə beynəlxalq sertifikatların təqdimetmə mərasimi keçirilib.

Tədbirdə ADNSU-nun rektoru, professor Mustafa Babanlı çıxış edərək müasir dövrdə gənclərin layihə idarəetməsi sahəsində hazırlığının vacibliyindən və bu istiqamətdə universitetin atdığı addımlar barəsində danışıb. Daha sonra AzPMA-nın prezidenti, professor İqbal Babayev çıxış edərək beynəlxalq təcrübələrdən nümunələr gətirib və layihələrin idarə edilməsi sistemində yeni istiqamətlərdən, imkanlardan bəhs edib.

Tədbirdə Azərbaycan Texniki Universiteti, Milli Aviasiya Akademiyası, Azərbaycan Dövlət Neft və Sənaye Universiteti, Azərbaycan Respublikası Prezidenti yanında Dövlət İdarəçilik Akademiyası, Azərbaycan Memarlıq və İnşaat Universiteti, Azərbaycan Turizm və Menecment Universiteti, Azərbaycan Mühəndislik Universiteti, Dövlət İqtisad Universitetinin nümayəndələri iştirak etmişdilər.

Sonda IPMA beynəlxalq standartları əsasında keçirilən imtahanı müvəffəqiyyətlə başa vurmuş hər bir iştirakçıya beynəlxalq sertifikat təqdim edilib. Onların adları IPMA-nın beynəlxalq reyestrinə daxil edilib və əldə etdikləri sertifikat dünya ölkələri tərəfindən tanınacaq.

Sonda iştirakçılar layihənin təşəbbüskarlığına görə İqbal Babayevə, təşkilatçılığa görə Mustafa Babanlıya təşəkkürlərini bildiriblər. Həmçinin, iştirakçılar tədbirin sonunda ADNSU-da yeni açılan açıq kitabxana ilə də tanış olublar