Xəbərlər

Sentyabrın 29-da Azərbaycan Dövlət Neft və Sənaye Universitetində (ADNSU) universitetin mülki müdafiə qüvvələrinin xəbərdarlıq və toplanış məşqi keçirilib. Mülki müdafiə qərargahının rəisi Elşən Məmmədovun rəhbərliyi ilə keçirilən toplantıda universitetin fakültə və şöbələrindən olan mülki müdafiə qüvvələri iştirak edib. Elşən Məmmədov fövqəladə vəziyyətlərdə minimum tələfat və itki ilə vəziyyətdən çıxma yolları və davranış qaydaları haqqında təlimat verib. Daha sonra qərargah rəisi fövqəladə hallar zamanı yaranan vəziyyətlərdən çıxış yollarını izah edib və ümumi təlimatlardan danışıb.

Toplantının keçirilməsində məqsəd fövqəladə hallar zamanı baş verə biləcək itkilərin qarşısını almaq və hər hansı fəlakətin nəticələrinin aradan qaldırılması üçün mülki müdafiə qüvvələrində vərdiş halı yaratmaqdır.

Qeyd edək ki, mülki müdafiə üzrə keçirilən məşqlər ADNSU-nun mülki müdafiə rəisi, rektor, prof. Mustafa Babanlı və Nəsimi rayonu Fövqəladə Hallar və Müdafiə Şöbəsinin rəisi Musa Məhərrəmov tərəfindən razılaşdırılmış illik tədbirlər planına uyğun keçirilir. Toplantılar ildə 2 dəfə mülki müdafiə qüvvələri və komandir-rəis heyəti cəlb olunmaqla universitet səviyyəsində rəhbərliyin əmr və hazırlıq planına uyğun aparılır.