Azərbaycan Dövlət Neft və Sənaye Universiteti (ASOIU) ilk dəfə olaraq Times Higher Education (THE) reytinqində iştirak edərək mühəndislik sahəsində fənn reytinqində (subject ranking) 1251+ mövqeyində yer alıb. Bu, universitetimizin elmi və akademik nüfuzunun artırılmasına böyük təsir göstərir.
ADNSU-nun mühəndislik sahəsindəki məqalələri və araşdırmalarına beynəlxalq səviyyədə geniş şəkildə istinad edilir və universitet ölkə üzrə mühəndislik sahəsində ən yüksək istinad sayını əldə edib. Bu nailiyyətlər, ADNSU-nun mühəndislik sahəsindəki güclü araşdırma bazasını və qlobal səviyyədə təsirini əks etdirir.
Biz, universitetimizin akademik uğurlarının daha da artacağına inanır və gələcəkdə daha yüksək çox nailiyyətlər əldə edəcəyimizə əminik.
Qeyd edək ki, 11 fənn sahəsi üzrə dərc olunan reytinqdə ADNSU “Mühəndislik” üzrə dünyanın ən yaxşı universitetlərinin siyahısında 1251+ mövqeyində qərarlaşıb. Onu da qeyd edək ki, “THE dünyanın ən yaxşı universitetlərinin fənn reytinqi”nin qiymətləndirmə metodologiyasında 5 istiqamət (tədris, tədqiqat mühiti, tədqiqat keyfiyyəti, sənaye və beynəlmiləlləşmə) üzrə 18 meyar nəzərə alınır. Sözügedən reytinqdə 11 geniş fənn sahəsi və 33 dar fənn kateqoriyası üzrə təhlil aparılır.
