Mayın 23-də Azərbaycan Dövlət Neft və Sənaye Universitetində (ADNSU) “Azərbaycan Xalq Cümhuriyyəti (AXC) Şərqdə ilk Demokratik Respublikadır” mövzusunda tədbir keçirilib. Tədbirdə ADNSU-nun rektoru, professor Mustafa Babanlı, tarixçi-tədqiqatçı alim Firdovsiyyə Əhmədova, millət vəkili Aydın Mirzəzadə, Səs media qrupun baş direktoru Bəhruz Quliyev, YAP siyasi şurasının üzvü, “İki sahil” qəzetinin baş redaktoru Vüqar Rəhimzadə, eləcə də universitetin professor-müəllim heyəti və tələblər iştirak edib.
Azərbaycan Respublikasının Dövlət Himni səsləndikdən sonra məlumat verilib ki, ölkə başçısı İlham Əliyevin 16 may 2017-ci il tarixli sərəncamına əsasən universitetdə AXC-nin 100 illiyinə həsr olunan tədbirlər planı hazırlanıb. Ayrı-ayrı qruplarda Cümhuriyyətə həsr olunan dərslər aparılıb, tələbələrlə görkəmli dövlət xadimlərinin, tədqiqatçıların görüşləri keçirilib.
ADNSU-nun rektoru, professor M.Babanlı AXC-nin yaranması tarixi və bu hadisənin ölkəmizin sonrakı inkişafına verdiyi töhfələrdən bəhs edib. Rektor M.Babanlı məhz AXC dövründə bir çox ilklərə imza atıldığını və müstəqil Azərbaycanın hüquqi dövlət kimi AXC-nin varisi olduğunu deyib. O Azərbaycan Respublikasının XX əsrin sonlarında dövlət suverenliyini bərpa etməsindən sonra əldə olunmuş müstəqilliyin qorunub saxlanması və daha da möhkəmlənməsində ulu öndər Heydər Əliyevin xüsusi rolunu vurğulayıb. Rektor M.Babanlı müstəqilliyin qorunması üçün təhsili mühüm amillərdən biri kimi səciyyələndirib və inkişaf edən Azərbaycan iqtisadiyyatı və sənayesinin tələblərinə cavab verən səviyyədə yüksək təhsil verilməsini ADNSU-nun əsas hədəfi olduğunu qeyd edib.
Tarixçi-tədqiqatçı alim Firdovsiyyə Əhmədova öz çıxışında Azərbaycan xalqının şanlı tarixinin ən parlaq səhifəsi olan AXC-nin yaranmasından və o dövrün siyasi vəziyyətindən danışıb. AXC-nin Tiflisdə elan olunduğunu, daha sonra Bakının azad edildiyini qeyd edən natiq 1920-ci ildə Azərbaycanın müstəqilliyinin beynəlxalq aləmdə tanınmasını AXC-nin ən böyük nailiyyətlərindən biri kimi səciyyələndirib.
Millət vəkili Aydın Mirzəzadə də öz çıxışında texniki bir ali təhsil ocağında Cümhuriyyətin 100 illiyinin qeyd olunmasının xüsusilə əlamətdar olduğunu deyib. Azərbaycan xalqının XX əsrdə yenidən müstəqillik qazanmasını onun tarixən müstəqil təfəkkürə malik olması ilə əlaqələndirən millət vəkili 23 ay mövcud olmasına baxmayaraq AXC-nin Azərbaycan xalqının müstəqil dövlət yaratmağa qadir olduğunu bütün dünyaya nümayiş etdirdiyni vurğulayıb.
Səs Media qrupunun baş direktoru Bəhruz Quliyev AXC-nin yaradılmasında ziyalıların böyük rolu olduğunu qeyd edərək 23 ay müddətində gənc dövlətin nail olduğunu inqilabi dəyişiklikləri qeyd edib. Qısa müddətdə dövlət atributlarının - ordunun, parlamentin formalaşdırıldığını və bir sıra ilklərə imza atıldığını qeyd edən natiq AXC-nin yaranmasından keçən 100 ilin 50-nin ulu öndər Heydər Əliyevin adı ilə bağlı olduğunu bildirib.
“İki sahil” qəzetinin baş redaktoru Vüqar Rəhimzadə AXC-nin yaranmasını tarixi nailiyyət kimi dəyərləndirərək həmin dövrdə bir sıra mühüm işlərin görüldüyünü diqqətə çatdırıb. O 1991-ci ildə müstəqilliyini bərpa edən Azərbaycan Respublikasının yalnız ulu öndər Heydər Əliyevin qətiyyəti sayəsində qorunub saxlandığını və möhkəmləndiyini qeyd edərək hər bir Azərbaycan vətəndaşının Azərbaycan dövlətinin yanında olub ölkə başçısı tərəfindən həyata keçirilən işləri dəstəkləməli olduğunu vurğulayıb.
