Azərbaycan Dövlət Neft və Sənaye Universiteti ilə Böyük Britaniyanın Vorvik Universiteti arasında müştərək şəkildə həyata keçirilən beynəlxalq İkili Diplom Proqramına 2024/2025-ci tədris ili çərçivəsində qəbul prosesi davam edir.
Azərbaycan elmi və təhsili üçün yeni imkanlar açan və xüsusi tədris planı təklif edən sözügedən İkili Diplom Proqramının davam etdirilməsi 2025-ci il üçün QS dünya universitetləri reytinq cədvəlində 69-cu yerdə qərarlaşan Vorvik Universiteti ilə uzunmüddətli əməkdaşlıq və tərəfdaşlıq münasibətlərinə əsaslanır. Qeyd edək ki, fəaliyyəti tamamilə ADNSU vəsaiti hesabına təmin ediləcək bu İkili Diplom Proqramında tələbələr tamamilə ödənişsiz şəkildə təhsil alacaqlar.
“Bərpa olunan enerji mənbələri” üzrə magistratura səviyyəsində tədris təklif edən bu proqramın əsas hədəfi ən qabaqcıl elmi nailiyyətlərdən, innovativ təlim-tədris texnologiyalarından yararlanaraq, ölkəmizdə bərpa olunan enerji sahəsində yeni nəsil mütəxəssislərin yetişdirilməsi, Azərbaycanın təmiz enerjiyə keçidinə həm akademik, həm də texniki tərəfdən mümkün töhfələrin verilməsidir. Başqa sözlə, Böyük Britaniyaya getmədən İngiltərə təhsilini ölkəmizə gətirən bu İkili Diplom Proqramının əsas məqsədi bərpa olunan enerji texnologiyalarından istifadə üzrə ixtisaslaşmış milli mütəxəssislərin hazırlanmasıdır.
Proqram Vorvik Universitetinin “Warwick Manufacturing Group” (WMG) departamenti tərəfindən tədris edilən səkkiz modul və müvafiq kurs işlərini, həmçinin ADNSU-nun təklif etdiyi altı fənn blokunu bitirən, eləcə də dissertasiya işini uğurla təqdim edən bütün tələbələrə həm Vorvik Universitetinin, həm də ADNSU-nun magistr dərəcəsini qazanmaları üçün əhatəli tədris planı təklif edir.
Burada təhsil alan tələbələrə gələcəkdə 35 gün davam edən Yay Məktəbi dövründə Böyük Britaniyada günəş paneli tarlaları və külək turbinlərinin istismarı zonaları da daxil olmaqla aparıcı bərpa olunan enerji bölgələrinə, həmçinin sahə ilə əlaqəli şirkətlərə baş çəkmək üçün misilsiz fürsətlər təqdim olunur. Qeyd etmək lazımdır ki, səyahət və viza xərcləri daxil olmaqla səfər xərcləri, həmçinin, qalma və qidalanma da daxil bütün əlaqədar xərclər ADNSU tərəfindən tam formada ödənəcəkdir. Yay Məktəbi dövründə “Energy Systems Integration” və “UK Renewable Energy Sector” fənn blokları tədris ediləcəkdir. Əlavə olaraq, Yay məktəbinin tədris planında tarixi abidələrin, eləcə də muzeylərin tələbələr tərəfindən ziyarət edilməsi və bu qəbildən olan müxtəlif mədəni fəaliyyətlər nəzərdə tutulub.
Sözügedən təhsil proqramı üçün tədrisə cəlb edilən dünya səviyyəli professor-müəllim heyəti tələbələrin sürətlə inkişaf edən sektorda rəqabət üstünlüyü qazanmaları, həmçinin ölkəmizin karbonsuz təmiz enerjiyə keçidində açar rol oynamaları üçün lazım olan bilik və bacarıqlara yiyələnmələrini təmin edəcəklərdir.
Proqrama qəbul şərtləri:
- 6.5 IELTS imtahan balı (hər komponent üzrə minimum 6.0 olmaqla).
- Namizədin motivasiyasını, şəxsi keyfiyyətlərini, ünsiyyət bacarıqlarını, həmçinin yaradıcılığını nümayiş etdirən video müraciət (maksimum 2 dəqiqə uzunluğunda).
- 2024-cü il ərzində Dövlət İmtahan Mərkəzi tərəfindən təşkil olunan magistraturaya qəbul imtahanından minimum 50 keçid balı.
- Bakalavr dərəcəsinə uyğunluq (ixtisaslar üçün linkə keçid edin: https://asoiu.edu.az/info_main);
Tədris proqramı barədə ətraflı məlumat və yeniliklər üçün https://asoiu.edu.az/info_main saytını ziyarət edin.
Əlavə suallarınız üçün info.warwick@asoiu.edu.az, rəsmi qeydiyyat və qəbulla bağlı məsələlər üçün admission.warwick@asoiu.edu.az elektron poçt ünvanına (mobil nöm: (+994) 503408827) müraciət edə bilərsiniz.
