Azərbaycan Dövlət Neft və Sənaye Universiteti (ADNSU) əcnəbi vətəndaşların ali təhsil müəssisəsinə qəbulunu davam etdirir. Universitet 2025/2026-cı tədris ili üzrə əcnəbi tələbələr üçün onlayn müraciətlər qəbul edilir.
ADNSU-da “Heydər Əliyev adına təqaüd” proqramı üzrə təhsil almaq məqsədilə müraciət etmiş xarici vətəndaşlarla 3 gün ərzində ümumilikdə 93 nəfər xarici vətəndaşla onlayn müsahibə keçirilib. Onlardan 13 nəfər doktorantura, 44 nəfər magistratura, 36 nəfər bakalavriat proqramı üzrə müraciət edib. Qiymətləndirmə nəticəsində 85 nəfərin müraciəti qəbul edilib. 8 nəfərin müraciəti isə müxtəlif səbəblərdən qəbul edilməyib. Müsahibələr zamanı namizədlərin dil bilikləri və ümumi bilik səviyyələri qiymətləndirilib. Onlayn formatda təşkil olunan müsahibələrdə iştirak edən namizədlərin əksəriyyəti uğurlu nəticələr göstərib.
Qeyd edək ki, “Heydər Əliyev adına təqaüd” proqramı Azərbaycan Respublikası tərəfindən həyata keçirilən, ölkəmizin ali təhsil müəssisələrində əcnəbi tələbələrin təhsil alması üçün dəstək məqsədilə nəzərdə tutulan xüsusi proqramdır. Proqramın məqsədi Azərbaycanın beynəlxalq elmi-təhsil əlaqələrinin genişləndirilməsi və yüksək ixtisaslı kadrların hazırlanmasına töhfə verməkdir.
Xatırladaq ki, 2024-2025-ci tədris ilinin statistikasına əsasən hazırda universitetdə 25 ölkədən 227 nəfər əcnəbi tələbə təhsil alır. Universitetin beynəlxalq əlaqələrinin genişlənməsi və tədris keyfiyyətinin artması nəticəsində, dünyanın müxtəlif ölkələrindən olan tələbələr ADNSU-da ali təhsil almağa maraq göstərirlər.
