Azərbaycan Dövlət Neft və Sənaye Universitetinin (ADNSU) tələbələri beynəlxalq səviyyəli yay məktəbini uğurla başa vurublar. ADNSU-nun Kimya-texnologiya fakültəsinin 3-cü kurs tələbələri- Aydan Nadirova və Murad Bağırzadə Oksford Universitetinin Said Biznes Məktəbində təşkil edilən "Sahibkarlıq, davamlılıq və innovasiya" mövzusunda keçirilən yay məktəbində ölkəmizi layiqincə təmsil edərək proqramı başa vurublar.
İyulun 12-dən 18-dək davam edən Yay məktəbində ümumilikdə 22 tələbə iştirak edib. Yay məktəbi çərçivəsində onlar sahibkarlıq, davamlı inkişaf və innovasiya sahəsində intensiv təlimlər alıb, kreativ düşüncə, liderlik və qlobal problemlərə biznes yanaşması mövzusunda müxtəlif interaktiv seminar və sessiyalarda iştirak ediblər.
Proqram çərçivəsində hər bir iştirakçı öz startap ideyası üzərində işləyərək onu ilkin konsepsiyadan təqdimat mərhələsinə qədər inkişaf etdirmək imkanı əldə edib. Gənclər yaradıcılığı, əməkdaşlığı və liderliyi təşviq edən praktiki seminar və interaktiv sessiyalarda iştirak etməklə innovativ fikirlərini gerçəkləşdirməyə doğru ilk addımlarını atıblar.
Tədris müddətində tələbələr yalnız sahibkarlıq bacarıqlarını deyil, həm də qlobal problemlərin biznes vasitəsilə necə həll edilə biləcəyini müxtəlif mədəniyyətlərdən olan həmyaşıdları ilə birlikdə araşdırıblar. Proqram real dünya problemləri ilə işləmə, fürsətləri müəyyənləşdirmə və cəmiyyət üçün faydalı biznes modelləri qurma imkanını təqdim edib.
Yay məktəbi sonunda iştirakçılar hazırladıqları layihələri münsiflər heyəti qarşısında təqdim edərək real sahibkarlıq mühitində təcrübə qazanıblar.
Yay məktəbini uğurla başa vuran iştirakçılara Oksford Universitetinin rəsmi sertifikatı təqdim olunub. Bu uğur, ADNSU tələbələrinin qlobal miqyasda rəqabətə davamlı olduğunu və universitetin beynəlxalq əməkdaşlıqlara verdiyi önəmi bir daha nümayiş etdirir.
