Azərbaycan Dövlət Neft və Sənaye Universitetinin (ADNSU) “Kompüter elmləri” ixtisasının tələbəsi Nicat Axundzadə avqustun 26-27-də keçirilən VI Beynəlxalq “Kibernetika və İnformatikanın problemləri” (PCI 2025) konfransında elmi məruzə ilə çıxış edib.
İki gün davam edən konfransda 30-a yaxın ölkədən alim və tədqiqatçılar öz elmi işlərini təqdim ediblər. Nicat Axundzadə tədbirdə “Dünya Bankı verilənlərindən istifadə etməklə ölkələrin çoxsahəli indikatorlar əsasında klasterləşdirilməsi” mövzusunda tədqiqat işini təqdim edib. ADNSU-nun “Ümumi və tətbiqi riyaziyyat” kafedrasının müəllimləri də konfransda moderator və məruzəçi qismində iştirak ediblər.
Qeyd edək ki, Konfrans, Elm və Təhsil Nazirliyinin İnformasiya Texnologiyaları İnstitutu (İTİ), İdarəetmə Sistemləri İnstitutu (İSİ),Türkiyənin Ege Universiteti, Ukraynanın V.M. Qluşkov adına Kibernetika İnstitutu, Qazaxıstanın İnformasiya və Hesablama Texnologiyaları İnstitutu və Yunanıstanın Thessaly Universitetinin birgə təşkilatçılığı ilə baş tutub. Tədbir kompüter elmlərinin aktual istiqamətlərinə – süni intellekt, optimallaşdırma, obrazların tanınması və digər problemlərə həsr olunub.
Konfransa təqdim olunan bütün məqalələrin IEEE Xplore rəqəmsal kitabxanasında və Scopus elmmetrik bazasında indeksləşdiriləcəyi bildirilib.
