9 oktyabr saat 14:00-da UFAZ-da seminar keçiriləcək. Mühazirəçi Türker Bıyıkoğlu “Qraf entropiyası, dərəcə assortativliyi və şəbəkələrdə iyerarxik strukturlar” mövzusunda çıxış edəcək.
Mühazirədə mürəkkəb şəbəkələrin müxtəlif deskriptorları arasındakı əlaqələr və onların şəbəkələrin funksiyası ilə bağlılığı riyazi alətlər vasitəsilə təhlil olunacaq. Entropiya nizamsızlıq və mürəkkəbliyi kəmiyyətcə ifadə edən fundamental anlayış kimi təqdim olunacaq və qonşuluq matrisinin spektral radiusu ilə sıx əlaqəsi müzakirə ediləcək. Digər əsas məqam isə ilk dəfə kimya sahəsində tətbiq olunan və qraf entropiyasına aşağı sərhəd verən Randić indeksi olacaq. Bu indeks sosial şəbəkələrdə yüksək dərəcəli düyünlərin digər yüksək dərəcəli düyünlərlə əlaqələnməsi meyli ilə – yəni assortativliklə – yaxın bağlılığı ortaya qoyur.
Seminarın sonunda kompüter elmlərində iyerarxik strukturların əsas nümunəsi olan və bütün bu anlayışların maksimallaşdırılmasını xarakterizə edən dərəcələrin azalan qaydada genişlik üzrə axtarış sıralaması təqdim ediləcək. Bu iş Bilkənt Universitetindən professor Fatihcan Atay ilə birgə aparılmışdır.
Türker Bıyıkoğlu daha əvvəl İzmir Yüksək Texnologiyalar İnstitutunda və Işık Universitetində dosent vəzifəsində çalışıb. O, doktorluq dərəcəsini Vyana Universitetində riyaziyyat üzrə almış, postdoktoral tədqiqatlarını isə Max Planck Riyaziyyat Elmləri İnstitutunda (Leypsiq) və Louvain Katolik Universitetində aparmışdır. Onun tədqiqat təcrübəsi riyaziyyatla yanaşı nəzəri kimya, biologiya, bioinformatika və mühəndislik sahələrini əhatə edir. Eyni zamanda TÜBİTAK və Avropa Elm Fondu tərəfindən dəstəklənən beynəlxalq layihələrdə iştirak etmişdir.
Qeyd edək ki, ADNSU Riyaziyyat mərkəzi fəaliyyətə yeni başlayıb. Mərkəzin proqramı çərçivəsində tanınmış riyaziyyatçılar mütəmadi olaraq universitetə dəvət olunacaq və seminarlarla yanaşı təlimlər də keçirəcəklər.
