Xəbərlər

Oktyabrın 31-də Azərbaycan Dövlət Neft və Sənaye Universitetində (ADNSU) Elmi Şuranın növbəti iclası keçirilib. İclasdan öncə rektor, dosent Rüfət Əzizov ADNSU-nun “Ömürboyu Təhsil Mərkəzinin” direktoru, dosent Hamlet Hüseynovu yubiley yaşı münasibətilə təbrik edib, ona fəaliyyətində uğurlar arzulayıb.

Sonra rektor, dosent Rüfət Əzizov iclası açaraq gündəlikdə yer alan məsələləri şura üzvlərinin diqqətinə çatdırıb və gündəlik təsdiqlənib.

Rektor çıxışında ADNSU-da tədris prosesinin daha da təkmilləşdirilməsi, elmi-tədqiqat fəaliyyətinin keyfiyyətinin artırılması və universitetin beynəlxalq elmi məkanda mövqeyinin gücləndirilməsi istiqamətində görülən işlərdən danışıb. O, universitetdə həyata keçirilən layihələrin və beynəlxalq əməkdaşlıqların təhsil mühitinə verdiyi töhfəni vurğulayaraq tələbə və müəllim heyətinin bu istiqamətdə daha da fəal olmasının vacibliyini qeyd edib.

Daha sonra gündəlikdəki məsələlər üzrə məruzələr dinlənilib.

Tədris məsələləri üzrə prorektor, dosent Rza Məmmədov 2025/2026-cı tədris ili üzrə akademik yük, professor-müəllim və tədris-köməkçi heyətin ştatı barədə məlumat verib. O, həmçinin 2024/2025-ci tədris ilində bakalavr buraxılışı üzrə Dövlət Attestasiyasının nəticələri və magistr dissertasiyalarının müdafiələri haqqında ətraflı məlumat təqdim edib.

Elm və innovasiya məsələləri üzrə prorektor v.m.i.e., dosent Elviz İsmayılov doktoranturada aparılan işlər və doktoranturaya qəbulun nəticələri, eləcə də dosent və professor elmi adlarına iddiaçıların sənədlərinin AAK-a təqdim edilməsi qaydaları barədə çıxış edib.

Elmi Şuranın gündəliyinə uyğun olaraq ADNSU-nun Maliyyə və təminat departamentinin direktor müavini, Baş mühasibin v.m.i.e Mehman Əliyev universitetdə payız-qış mövsümünə hazırlığın vəziyyəti barədə məlumat verib, mühüm tədbirlərin icra vəziyyətini şura üzvlərinin diqqətinə çatdırıb.

İclasda gündəlikdəki digər məsələlər də müzakirə olunub, şura üzvləri tərəfindən fikir və təkliflər səsləndirilib.

Sonda rektor Rüfət Əzizov çıxış edərək müzakirələrdə səsləndirilən təkliflərin nəzərə alınacağını bildirib, aidiyyəti struktur rəhbərlərinə müvafiq tapşırıqlar verib.