Xəbərlər

Noyabrın 6-da Azərbaycan Dövlət Neft və Sənaye Universitetində (ADNSU) Zəfər Gününə həsr olunmuş “Zəfərə gedən yol” adlı tamaşa təşkil olunub. Tədbir universitetin tələbə-teatr kollektivi tərəfindən təqdim olunub.

Tamaşada Qarabağın işğal illəri, insanların doğma yurdlarından didərgin düşməsi, Azərbaycan xalqının mübarizəsi, 44 günlük Vətən müharibəsinə aparan yol tarixi və Zəfər bədii şəkildə canlandırılıb. Səhnə əsərində obrazları vasitəsilə həm torpağa olan sevgi, həm də xalqın gücü və iradəsi ifadə edilib.

Tədbirə “Vətən yaxşıdır” kompozisiyası ilə başlanılıb, ardınca tamaşanın müxtəlif səhnələrində milli musiqilər və xronoloji görüntülər təqdim olunub. Əsgər obrazları vasitəsilə döyüş ruhu, Şəhid obrazı ilə isə Vətən uğrunda canından keçənlərin əziz xatirəsi anılıb.

Tamaşanın finalında “Qarabağ Azərbaycandır!” şüarı səsləndirilib və Şuşanın azadlığı, Qarabağın Zəfərlə yenidən dirçəlişi böyük duyğu ilə nümayiş olunub.
 

Tədbir alqışlarla başa çatıb.