Xəbərlər

Noyabrın 12-də Azərbaycan Dövlət Neft və Sənaye Universitetində (ADNSU) Konstitusiya Gününə həsr olunmuş  “Hüquqi dövlət quruculuğunda konstitusion dəyərlər” adlı dəyirmi masa təşkil olunub.

Tədbir Azərbaycan Respublikasının Dövlət Himninin səsləndirilməsi ilə başlayıb. ADNSU-nun Təhsilalanlarla iş şöbəsinin müdiri Rəna Cəbrayılova iştirakçılara dəyirmi masanın məqsədi və əhəmiyyəti barədə məlumat verərək konstitusiya biliklərinin gənc nəsil üçün əhəmiyyətini qeyd edib.

AMEA Fəlsəfə və Sosiologiya İnstitutunun aparıcı elmi işçisi, siyasi elmlər üzrə fəlsəfə doktoru, dosent Sənan Həsənov çıxış edərək Konstitusiyanın dövlət quruculuğunda və ictimai həyatın bütün sahələrində rolundan danışıb. O, Konstitusiyanın yalnız qanunlar toplusu olmadığını, həm də vətəndaşların hüquq və azadlıqlarının təminatçısı olduğunu qeyd edib. Dosent həmçinin vurğulayıb ki, Konstitusiyanın prinsiplərinin cəmiyyətə inteqrasiyası xüsusilə gənc nəsil arasında hüquqi maarifləndirmə tədbirləri vasitəsilə mümkün olur. O, Konstitusiyanın dövlət idarəçiliyində stabillik və şəffaflıq təmin edən mühüm institut olduğunu və qanunların yerinə yetirilməsinin cəmiyyətin inkişafına birbaşa təsirini diqqətə çatdırıb.

Tələbələrin də iştirak etdiyi tədbirdə ADNSU-nun tələbəsi və universitetin nəzdində fəaliyyət göstərən Heydər Əliyev Məktəbinin direktoru Sənan Hüseynov çıxışında gənclərin vətənpərvərlik və hüquqi biliklər baxımından formalaşması ilə bağlı şəxsi fikirlərini bölüşüb.

Tədbir çərçivəsində Konstitusiya Gününə həsr olunmuş videoçarx da nümayiş etdirilib.