Xəbərlər

Azərbaycan Dövlət Neft və Sənaye Universitetində (ADNSU) həyata keçirilən “Natiqlik sənəti və kommunikasiya bacarıqları” layihəsi çərçivəsində növbəti təlim baş tutub. Sessiya ADNSU-nun İctimaiyyətlə əlaqələr və marketinq şöbəsinin baş mütəxəssisi və “AZİXəbər” layihəsinin aparıcısı Günel Tağıyeva tərəfindən aparılıb.

Təlim “Nitq və artikulyasiya” mövzusuna həsr olunub və tələbələrə düzgün tələffüz, səsləndirmə texnikaları, nitqin aydınlığı və danışıqda artikulyasiyanın rolu barədə geniş məlumat verilib. Günel Tağıyeva nitqin ritmi, vurğu, intonasiya, nəfəsin idarə edilməsi və sözlərin səhnədə və kamera qarşısında necə daha aydın səsləndirilməsi barədə praktiki nümunələr təqdim edib.

Media sahəsində aparıcı kimi əldə etdiyi təcrübələrə əsaslanaraq o, kamera qarşısında danışıq mədəniyyəti, vizual və verbal harmoniyanın qorunması, auditoriya ilə səmimi və təsirli ünsiyyət yaratmaq yolları barədə tövsiyələr verib. Təlim zamanı real çəkiliş proseslərindən misallar göstərilib, səhv və düzgün tələffüz nümunələri müqayisə edilərək izah olunub.

Sessiya interaktiv şəkildə davam edib. Tələbələr artikulyasiya məşqləri ediblər, qısa mətnləri yüksək səslə oxuyaraq düzgün nəfəs və ritm üzərində çalışıblar. Kamera qarşısında sınaq çıxışları təşkil edilib və iştirakçılara fərdi qaydada rəy verilib. Tələbələr nitqin texniki tərəflərini praktik olaraq tətbiq etmək imkanı əldə ediblər.

Qeyd edək ki, “Natiqlik sənəti və kommunikasiya bacarıqları” layihəsi çərçivəsində tələbələr üçün media və kommunikasiya sahəsində tanınmış mütəxəssislərin iştirakı ilə silsilə təlimlər keçirilir. Proqramın sonunda iştirakçılara sertifikatlar təqdim olunacaq və ən yüksək nəticə göstərən üç tələbə ADNSU Tələbə Həmkarlar İttifaqı Komitəsi tərəfindən xüsusi mükafatlandırılacaq.