Xəbərlər

Azərbaycan İnnovasiya Mərkəzində SABAH qrupları və İnnovasiya və Rəqəmsal İnkişaf Agentliyinin tabeliyində fəaliyyət göstərən Azərbaycan Kibertəhlükəsizlik Mərkəzinin birgə təşkilatçılığı ilə “Secure Tomorrow” hakatonu keçirilib.

Bu il ikinci dəfə təşkil olunan hakatonun mövzusu faylların təhlükəsizliyinin yoxlanılması üçün süni intellekt əsaslı “sandbox” sistemlərinin hazırlanması olub. İştirakçılar müxtəlif üsullarla yüklənmiş faylların izolyasiya olunmuş mühitdə avtomatlaşdırılmış analizini və zərərli davranışların aşkarlanmasını təmin edən süni intellekt əsaslı həllər təqdim ediblər.

Yarışda Azərbaycan Dövlət Neft və Sənaye Universiteti də daxil olmaqla ölkənin 10 universitetindən 45 komanda iştirak edib və onlardan 13-ü final mərhələsinə yüksəlib.

Nəticələrə əsasən, ADNSU tələbələrinin “Shreksploit”, “Praxis” və “DevSec” komandaları müvafiq olaraq 1-ci, 2-ci və 3-cü yerlərə layiq görülüblər.

Xatırladaq ki, 8 Noyabr – Zəfər Gününə həsr olunan hakaton dövlət başçısının “Azərbaycan Respublikasının 2025–2028-ci illər üçün Süni İntellekt Strategiyası”nın icrasına töhfə vermək və gəncləri kibertəhlükəsizlik sahəsində innovativ həllər yaratmağa təşviq etmək məqsədi daşıyıb.

Qalib layihələrin real mühitdə tətbiqi üçün müvafiq dəstək göstərilməsi nəzərdə tutulur.