Xəbərlər

Azərbaycan Dövlət Neft və Sənaye Universitetinin (ADNSU) fizika kafedrasının tədqiqatçı müəllimi Vüsalə Cəfərova və universitetin müəllimi Xəyalə Həsənovanın həmmüəllifi olduqları elmi məqalə yüksək impakt faktorlu və Q1 kvartilinə daxil olan “Nanoscale” jurnalında çap olunub.

Məqalə “Təkqatlı karbon nanoborularında xirallığın artması ilə ümumi vəziyyətlərin sıxlığının cihaz səviyyəsində proqnozlaşdırılması: ab initio modelləşdirmə və maşın öyrənməsi çərçivəsinin sintezi” adlanır.

Tədqiqatda təkqatlı karbon nanoborularının elektron xüsusiyyətlərinin onların xirallıq indekslərindən asılı olaraq necə dəyişdiyi araşdırılıb. Müəlliflər əvvəlcə kompüter hesablamaları vasitəsilə müxtəlif nanoboru növlərinin elektron parametrlərini müəyyənləşdirib, daha sonra bu nəticələri süni intellekt modelləri ilə ümumiləşdiriblər. Araşdırma göstərir ki, bəzi nanoborular metal davranışı nümayiş etdirir, digərləri isə dar enerji keçidinə malik yarımkeçirici xüsusiyyət göstərir. Bu nəticələr karbon nanomateriallarının gələcək texnoloji tətbiqləri üçün məqsədyönlü dizayn imkanlarını genişləndirir.