Xəbərlər

Azərbaycan Dövlət Neft və Sənaye Universitetinin (ADNSU) “Sənaye təhlükəsizliyi və əmək mühafizəsi” kafedrasının bir qrup müəllimi səmərəli təcrübə proqramı çərçivəsində “METAK” şirkətində olub.
Şirkətin rəhbəri Alik Kərimov müəllimlərə müəssisənin yaranma tarixi, inkişaf mərhələləri və müasir istehsalat fəaliyyəti barədə geniş məlumat verib. O, həmçinin şirkətin istehlakçılar arasında böyük etibar qazanmasını vurğulayıb, ADNSU məzunlarının işinə verdiyi önəmi qeyd edərək, onların məsuliyyətlə çalışdığını bildirib və universitetlə əməkdaşlığa açıq olduğunu söyləyib.
Sonra şirkətin əməkdaşları müəllimləri yüksək səviyyədə avtomatlaşdırılmış istehsal sahələri və laboratoriyalarla tanış ediblər. 2005-ci ildən etibarən bazar tələbatını nəzərə alaraq yüksək keyfiyyətli polipropilen xammalından hazırlanan, sərfəliliyi və uzunömürlülüyü ilə seçilən plastik boru və fitinqlərin istehsalı, həmçinin metal vərəqlərdən istifadə etməklə metal boru və məmulatların hazırlanması proseslərinin incəlikləri müəllimlərə əyani şəkildə izah olunub.
Sonda ADNSU-nun kafedra müdiri, prof. Sakit Rəsulov, şirkətin rəhbərliyinə və onları müşayiət edən əməkdaşlara müəllim kollektivi adından təşəkkürünü bildirib.