Xəbərlər

Azərbaycan Dövlət Neft və Sənaye Universitetinin (ADNSU) Elm və innovasiya məsələləri üzrə prorektoru vəzifəsini müvəqqəti icra edən, dosent Elviz İsmayılov ICPC Fondu tərəfindən “ICPC Qlobal İcması ilə Nümunəvi Əlaqə” mükafatına layiq görülüb.
Mükafat 31 avqust - 4 sentyabr 2025-ci il tarixlərində Bakı şəhərində keçiriən “ICPC 2025 - Tələbələr arasında Beynəlxalq Proqramlaşdırma Müsabiqəsi”nin (International Collegiate Programming Contest) Dünya Finalının Təşkilat Komitəsinin qərarına əsasən verilib. 
Elviz İsmayılov Azərbaycanın ICPC icmasının inkişafında və ölkə üzrə gənc istedadların təhsilində mühüm rol oynadığı, həmçinin yüksək peşəkarlığı və ali təhsildə göstərdiyi xidmətlərə görə təltif olunub.
Qeyd edək ki, “ICPC Qlobal İcması ilə Nümunəvi Əlaqə” mükafatı müsabiqənin təbliği və geniş ictimaiyyətə çatdırılmasında mühüm rol oynayan fərdlərə və ya qruplara təqdim edilir. Tələbələrin proqramlaşdırma bacarıqlarını, alqoritmik düşüncələrini və komanda işini inkişaf etdirməyə yönələn ICPC ötən əsrin 70-ci illərində ABŞ-da başlayıb, 1977-ci ildən beynəlxalq miqyasda keçirilir. Hər il 110 ölkənin 3 mindən çox universitetindən 50 mindən çox tələbə bu müsabiqədə iştirak edir. Universitetlər ilə sənaye arasında qlobal körpü rolunu oynayan müsabiqənin finalı 2025-ci ilin yayında ilk dəfə Bakıda keçirilib.