Xəbərlər

Noyabrın 26-da Azərbaycan Dövlət Neft və Sənaye Universitetində (ADNSU) Məzunlarla İş və Karyera Mərkəzinin təşkilatçılığı ilə CBM Engineering şirkətinin istehsalat təcrübəsi proqramına dair infosessiya keçirilib.
İnfosessiyada tələbələr, ADNSU-nun struktur bölmə rəhbərləri, həmçinin CBM Engineering şirkətinin nümayəndələri – Elektronika laboratoriyasının müdiri Sahib İbrahimxəlilov və SƏTƏM üzrə mütəxəssis Rəşid Məmmədov iştirak ediblər.
Infosessiya zamanı tələbələrə şirkətin fəaliyyəti, 14–20 həftəlik istehsalat təcrübəsinin məqsədi, tələbləri və seçim prosesi barədə ətraflı məlumat verilib. Proqram Energetika, Kimya-texnologiya, İnformasiya texnologiyaları və idarəetmə fakültələri və BA proqramları üzrə əsasən 4-cü kurs tələbələrini əhatə edib, eyni zamanda 3-cü kurs tələbələri də imkanlardan yararlanmaq üçün infosessiyada iştirak ediblər.
Sessiyanın sonunda CBM Engineering nümayəndələri tərəfindən tələbələrlə ilkin müsahibələr aparılıb. Müsahibələrdən uğurla keçən tələbələr şirkətdə istehsalat təcrübəsi keçmək imkanı qazanıblar. 
Qeyd edək ki, Məzunlarla İş və Karyera Mərkəzi əməkdaşlıq imkanlarını genişləndirmək və tələbələrin peşəkar inkişafına dəstək olmaq məqsədilə bu kimi tədbirləri davam etdirməyi planlaşdırır.