Xəbərlər

Noyabrın 27-də Azərbaycan Dövlət Neft və Sənaye Universitetində (ADNSU) görkəmli alim, Azərbaycanın neft kimyası elminin banilərindən biri, akademik Yusif Məmmədəliyevin anadan olmasının 120 illiyinə həsr olunmuş dəyirmi masa təşkil edilib. Tədbir ADNSU Kitabxana İnformasiya Mərkəzi (KİM) və Kimya texnologiya fakültəsinin (KTF) birgə təşəbbüsü ilə baş tutub.

Dəyirmi masanı Kitabxana İnformasiya Mərkəzinin müdiri Səlahət Mahmudovanın açaraq Azərbaycan kimya elminin inkişafında əvəzsiz xidmətləri olan akademik Yusif Məmmədəliyevin həyat yolu, elmi fəaliyyəti haqqında məlumat verib. Tədbirin əvvəlində alimin həyat və irsinə həsr olunmuş videoçarx nümayiş olunub.

Tədbirdə ADNSU rəhbərliyi və elmi ictimaiyyətin nümayəndələri iştirak ediblər. Belə ki, dəyirmi masada Y.Məmmədəliyev adına Neft-Kimya Prosesləri İnstitutunun baş direktoru, akademik Vaqif Abbasov, ADNSU rektorunun sosial məsələlər üzrə müşaviri Nəsibə Əmirbəyova, KTF-nin professor-müəllim heyəti və tələbələr yer alıblar.

Müzakirə zamanı akademik Vaqif Abbasov, KTF-nin dekanı professor Sevinc Məmmədxanova, ADNSU-nun professoru Minirə Ağahüseynova, Üzvi maddələr və yüksək molekullu birləşmələr kafedrasının müdiri, professor Fariz Əmirov, Kimya və qeyri-üzvi maddələrin texnologiyası kafedrasının müdiri, professor Yunis Qəhrəmanlı və KTF tələbəsi Ülkər Əsgərzadə çıxış edərək akademik Yusif Məmmədəliyevin Azərbaycan və dünya elminə verdiyi mühüm töhfələrdən, onun irsinin müasir kimyanın inkişafında oynadığı roldan danışıblar. Çıxışlarda həmçinin alimin elmi məktəbinin bu gün də uğurla davam etdirildiyi vurğulanıb.

Tədbirin sonunda iştirakçılara akademikin həyat və fəaliyyətinə həsr olunmuş kitab və nəşrlərdən ibarət sərgi də təqdim olunub. Sərgidə kimya elminin inkişafında misilsiz xidmətlər göstərmiş Yusif Məmmədəliyevin müəllifi və haqqında olan 30-a yaxın kitab və digər mətbuat nümunələri nümayiş etdirilib.